’মামু কথাবোৰ তই অলপ ভালকৈ ভাবি চাবি। স্বাৰ্থ আৰু জেদৰ বশৱৰ্তী হৈ সকলোবোৰ সিদ্ধান্ত তৎক্ষণাতে লৈ নেপেলাবিচোন’
’তোমালোকে কিয় নুবুজা কথাবোৰ মই বুজি নাপাওঁ মা।’
’চা তই এতিয়া সাধাৰণ মানুহ নহয়। তোৰ প্ৰতিটো লিখাই, তোৰ এটা ভাষণে বহুতকে জীয়াই থকাৰ অনুপ্ৰেৰণা দিয়ে। বহুতৰ ভাঙি যোৱা সংসাৰখন যোৰা লগায়।
’হ’ব মা, মোৰ প্ৰফেচন লাইফক এই মিনিংলেছ কথাবোৰৰ লগত সাঙুৰিলে বেয়া পাওঁ।’
’অহ, এতিয়া তোৰ সংসাৰখন মানে তোৰ কাৰণে মিনিংলেছহে হ’ল। আচলতে তোৰ এই পপুলাৰিটীয়ে বেয়াকৈ মূৰত ধৰিছে অ আই। শেষ কৰি পেলাইছ তই নিজকে। তই এনেকৈ চব হেৰুৱাইছ আৰু এদিন মোকো হেৰুৱাবি। চাই থাক।'
’হ’ব এইচব কথা মোৰ এতিয়া শুনি থাকিবলৈ সময় নাই মা, ৰাখিছো।’
কথাকেইটা কৈ মামু ওৰফে মন্দাকিনী বৰুৱায়ে মাকৰ লগত কথা পাতি থকা ফোনটো কাটি বিছনাত দলিয়াই দি বৃহতাকায় ড্ৰেছিংখনৰ ওচৰলৈ গ’ল। ইমান সময় মাকৰ লগত অদৰকাৰী কথাত লাগি থাকোঁতে তাইৰ আচল কামখিনি সামৰিবলৈকে আছে। মামুৱে জানিছিলেই এইটো কথা শুনাৰ পিছত যে মাকে দীঘলকৈ লেকচাৰ দিব, লগতে ইম'শ্যনেল অত্যাচাৰ। আজি ৰাতি তাই নতুন দিল্লীলৈ যাব লাগিব। কাইলৈ তাতে অনুষ্ঠিত হ’বলগীয়া মিটিং এখনত তাইক মুখ্য অতিথি হিচাবে আমন্ত্ৰণ কৰিছে। আজি সন্ধিয়ালৈ ফ্লাইট আৰু মামুৰ এতিয়ালৈকে পেকিং কৰা হোৱাই নাই। শুই উঠি পেকিং কৰাৰ কথা ভাবোঁতেই মাকি ফ’ন কৰি মিছামিছি কিছুমান কথা কৈ তাইৰ মূৰটো চোবাইছে। ইফালে আজি একসপ্তাহমান তাই ভালকৈ শুবলৈও পোৱা নাই। কালি ৰাতিও মিটিং এখন কৰি ঘৰ আহি পাই মানে প্ৰায় এঘাৰটামানেই বাজিল। আজি পুৱা একো কাম নথকা স্বত্বেও সাৰ পাই আছিল যদিও দেৰিকে উঠিব বুলি ভাবি এনেই বিছনাত পৰি থাকোঁতেই মাকৰ ফ’নটো আহিল।
আইনাখনৰ ওচৰলৈ আহি সোঁফালে থকা ড্ৰয়াৰটো খুলি বিভিন্ন ৰঙৰ নেইল পলিচৰ ভিতৰৰপৰা আকাশী ৰঙৰ নেইল পলিচটোৰ সৈতে ৰিম’ভাৰ এটা উলিয়াই আনিলে। কাইলৈ পিন্ধিব লগা আকাশী ৰঙৰ শাৰীখনৰ লগত মিলাই লগাওঁ বুলিয়েই নখৰ পৰা মামুৱে পৰহি লগোৱা ক’লা ৰঙটো এৰুৱাবলৈ ধৰিলে।
তাই বাৰু জীৱনটোক মাকে কোৱাৰ দৰে চিনেমাৰ নিচিনা কৰি পেলাইছে নেকি! সকলো গুচি যোৱাৰ দৰে যদি মাকো গুচি যায়! দেউতাকেতো তাইক অকল বিয়াখন দিবলৈহে ৰৈ আছিল। এহ যাহ তাই যি কৰি আছে ঠিকেই কৰি আছে। এইবোৰ কথা ভাবিবলৈ হ’লে তাই জীৱনত কেতিয়াও আগবাঢ়িব নোৱাৰিব। দিল্লীৰপৰা আহিয়েই ডিভ'ৰ্ছৰ কেছ ফাইল কৰিব লাগিব। এনেকৈ আৰু নোৱাৰি। চাৰে তিনিবছৰ হ'ল একেলগে নথকা ইফালে আইনীভাৱে একো হোৱাও নাই।
নেইলপলিছৰ কামবোৰ কৰি উঠি মামুৱে তাইৰ দিল্লী জাৰ্ণিৰ কাৰণে লগা যাৱতীয় বস্তুবোৰ পেকিং কৰি গা-পা ধুই ওলাই গ’ল মাইনা আৰু বুবুক লগ কৰিবলৈ। এসপ্তাহৰ কাৰণে তাই অসমত নাথাকে। গতিকে সিহঁতক যদি আজি তাই লগ কৰি নাহে, পিছত দুইটাই তাইক খাই মাৰিব। ড্ৰাইভিং চিটত বহি মামুৱে লুকিং মিৰৰকেইখন ঠিক কৰি লওঁতে তাই নিজৰ মুখখনলৈ চকু গ'ল। আচলতে ছোৱালীবোৰৰ কৰবাত আইনা এখন পালে নিজৰ মুখখন এবাৰলৈ হ’লেও চোৱাটো অভ্যাসেই গতিকে থাউকতে পাওঁতে মামুৱেনো কিয় নাচাব! দীঘল ভিজা চুলিখিনিৰে সৈতে আজি মামুৱে নিজকে বৰ ধুনীয়া দেখিলে। এনেও ধুনীয়া শব্দটো তাইৰ কাৰণে একো নতুন শব্দ নহয়। কিন্তু তাই নিজকে ধুনীয়া খুব কমেই দেখে। অকমানতে সন্তুষ্ট নোহোৱাটো মামুৰ জন্মগত স্বভাৱ বুলিবই পাৰি। সেয়ে চাগে আজি তাই বিচৰামতে চব পাইছে। আৰু পোৱাবোৰৰ বাবে থকাখিনিক চাগে অজানিতে হেৰুৱাইও পেলাইছে। আইনাত নিজকে আকৌ এবাৰ চাই মামুৱে ষ্টিয়েৰিং পকালে।
আইনাখনত আজি মামুৱে তাইক নিজকে ধুনীয়া দেখিছিল যদিও উকা কপালখনৰ সৈতে চকুহাল খুব ভাগৰুৱা যেন লাগিছিল।কপালখনত সেন্দুৰৰ আঁক নপৰা আজি চাৰে তিনিবছৰমানেই হ’ল চাগে। ’এহ এইকেইদিন ৰেষ্টলেছ ভাবে ঘূৰি আছে কাৰণে চাগে তেনেকুৱা লাগিছে, লগতে চকুত আজি কাজলো লগোৱা নাই ’ বুলি মনতে ভাবি এক্সিলেটৰডাল দবালে।
মাইনা আৰু বুবু তাই যাব বুলি শুনি স্কুল নগ'লেই। মামু গৈ পোৱালৈকে ঘৰৰ গেটৰ ওচৰতে ৰৈ আছিল দুইটা। পেহীয়েক বুলি ক’লে সিহঁত দুইটাই চব পাহৰি যায়। আনকি মাক-দেউতাককো নালাগে। মামুৱে সিহঁত দুটালৈ লৈ যোৱা বস্তুবোৰ দি অলপ সময় থাকি গুচি আহিল। ককায়েক নাই অফিচ গ’ল বৌৱেকো কিবা মহিলা সমিতিৰ কামত ওলাই গ’ল। আজিকালি মামুৱে বুজা হৈছে কিয় ককায়েক বৌৱেকৰ তাইৰ প্ৰতি ইমান আগ্ৰহ নোহোৱা হৈছে। তাই আহিব বুলি গম পালে কিবা এটা কৰি ইহঁত দুটাক ঘৰত থৈ ওলাই যায়। নাযাও বুলি ভাবিলেও বুবু মাইনাৰ কাৰণেই সপ্তাহত দুবাৰকৈ যাব লগা হয়। লাহে লাহে যে মাকো তাইৰপৰা আঁতৰি গৈছে মামুৱে বুজি পাইছে। মামুৱে ভাবে তাইনো এনেকুৱা কি ভুল কৰিলে নিজৰ মানুহবোৰো যে তাইৰপৰা আঁতৰি গৈছে।
জালুকবাৰীৰপৰা চানমাৰি পাওঁতে আজি তাইক বেছা সময় নালাগিল। আচলতে এই দুপৰীয়া সময়কণত ট্ৰেফিক অলপ কম থাকে সেয়ে চাগে। ঘৰ পাইয়ে তাই নাইটিটো গাত সোমোৱাই বাথৰূম পালেগে। কিয় জানো আজি তাইৰ মনটো ভাল লগা নাই। আৰু উকা কপালখন দেখাৰপৰাই অমিতলৈ দেখোন বৰকৈ মনত পৰিছে। হাত-মুখকেইটা ধুই আহি তাই পাণবজাৰৰ ফুডভিল্লাৰপৰা পেক কৰাই অনা চিকেন ৰ’লটো খাবলৈ লৈ ৰৈ গ’ল, মনেই যোৱা নাই দেখোন খাবলৈ। আজি বহুতদিনৰ মূৰত তাইৰ নিজকে ভাগৰুৱা আৰু অকলশৰীয়া যেন লাগিল। মাকে কোৱাৰ দৰে তাইৰ বাৰু পপুলাৰিটীবোৰে আমুৱাইছে নেকি!
কি কৰিম কি নকৰিম কৈ তাই ড্ৰেছিঙৰ ড্ৰয়াৰতে থৈ দিয়া নিজৰ বিয়াৰ ভিডিঅ কেছেটখন বিছনাতে থকা লেপটপটোত লগাই ল’লে। ৰঙা টিকটিকিয়া ফোটটোৰে তাইক..... আহ কি যে এক অধ্যায় আছিল এইটোও এটা। বিয়া হৈ অমিতৰ লগত মাত্ৰ দুটা বছৰ কটাবলৈকে মামুৱে ঘৰৰ লগত ইমান যুঁজিছিল নেকি বাৰু। ধেই আজিনো তাই কি পাহৰণিৰ গৰ্ভখনক আকৌ কুৰুকি কুৰুকি খান্দিছে। এই চাৰে তিনিবছৰ দেখোন মামুৱে আগতকে বহুত সুখত আছে। নিজৰ মতে উঠিছে, নিজৰ মতে ঘূৰিছে সকলো নিজৰ মতেই কৰিব পাৰিছে। সুখতেই যদি আছে মাজে মাজে বিয়াৰ কেছেটটো কিয় উলিয়াই চাই তাই!
’চেহ আজি কি অদৰকাৰী কথাবোৰ মনত পেলাই আছো’ বুলি মামুৱে লেপটপটো বন্ধ কৰি আকৌ এবাৰ বাথৰূম পালেগে। বাথৰূমৰ চাৱাৰটো খুলি দি মামু তাতে বহি পৰিল।আজি সন্ধিয়ালৈ ফ্লাইট আছে অলপ পিছতে ওলাই যাব লাগিব। আৰু তাই এতিয়া কি কৰি আছে। ফ্লাইটৰ কথা মনলৈ অহাৰ লগে লগে মামুৱে ঘপকৈ চাৱাৰৰ তলৰপৰা উঠি আহিবলৈ বিচাৰিলে যদিও নোৱাৰিলে। তেনেকৈয়ে একঘন্টামান বহি থাকি পুনৰ ৰূমলৈ আহিল। তাই আজি সঁচাকৈয়ে ভাগৰি পৰিছে। ইমানদিনে কেতিয়াবা কোনোবাখিনিত ভাগৰুৱা যেন লাগিলেও জুবিন গাৰ্গৰ 'মই ভাগৰা নাই জীৱন হেৰুৱা নাই' গান শুনিলে সকলো দূৰ হৈছিল। কিন্তু আজি তাই পৰা নাই। এনেকৈ হ'লে কাইলৈ থকা মিটিংখন এটেণ্ড কৰিব নোৱাৰিব য'ত তাই পতি পত্নীৰ সম্পৰ্কক লৈ বৰ বৰ ভাষণ দিব। যাৰ ভাষণে বহুত সংসাৰ ভাঙি যোৱাৰপৰা যোৰা লগাইছে। কিন্তু তেওঁৰ নিজৰ সংসাৰখনেই কৰিছে বা কি।
চাইক'লজীত এম এ এম ফিল পি এইচ ডি মন্দাকিনী বৰুৱা। সৰুৰেপৰা নিজক নিজৰ ভৰিত থিয় কৰাবলৈ অদম্য হেঁপাহ থকা ছোৱালীজনী, বহুতৰ কাৰণে প্ৰেৰণাৰ উৎস। জীৱনত যিটোকে কৰিব বিচাৰিছে নিজৰ বলত তাকেই পাৰিছে। এতিয়া সন্দিকৈ কলেজত লেকচাৰাৰ হিচাপে কৰ্মৰত মন্দাকিনিজনীতকৈও মানুহে চিনি পায় 'ৰিলেশ্যনশ্বিপ মটিভেশ্বনেল স্পিকাৰ'গৰাকীক। নিজৰ কলেজৰ দিনৰ প্ৰেমক বিবাহেৰে সফল কৰি এসময়ত ৰিলেশ্যনশ্বিপ আৰু লাইফৰ ওপৰত বক্তৃতা দি বিশেষভাৱে জনপ্ৰিয় হৈ উঠা মামুৰ আজিকালি এটা YouTube ভিডিঅ এৰাতিৰ ভিতৰত মিলিয়ন ভিউজ পায়, তাতকৈ আৰু কি লাগে।
অমিত দাস আৰু মন্দাকিনী বৰুৱাৰ এফেয়াৰ চলি আছে। এই খবৰটো ডিগ্ৰী ছেকেন্ড ইয়েৰ নালাগে কলেজখনতে বিগ ব্ৰেকিং নিউজ আছিল। এই খবৰটো এসময়ত সেইখন কলেজৰে বুৰঞ্জীৰ প্ৰফেচৰ মন্দাৰ দেউতাক অমল বৰুৱাৰ কাণতো পৰিছিল। যিয়ে সিহঁতৰ ঘৰখনলৈ আহিছিল অশান্তিৰ ৰূপত।
অমিত দাস এজন ল'ৰা হিচাপে খুবেই ভাল একমাত্ৰ তাৰ কাষ্টটো বাদ দি। এখন ব্ৰাহ্মণ ঘৰৰ ছোৱালীক কেনেকৈ দাস উপাধিৰ ল'ৰাটোৰ লগত বিয়াত বহিবলৈ মত দিয়ে মাক-দেউতাকে। কিন্তু মন্দা নাচোৰবান্দা। কলেজ পাছ কৰি দিল্লী ইউনিভাৰ্চিটিত পঢ়ি আহিল কিন্তু সিহঁতৰ প্ৰেম অটুত থাকিল। অৱশেষত তাইৰ যুদ্ধৰ অন্ত পৰিল আৰু কটন কলেজৰ ফিজিক্সৰ লেকচাৰাৰ অমিত দাসৰ পত্নী হিচাপে নতুন পৰিচয় ল'লে।
মন্দা অমিতৰ প্ৰেম কাহিনীৰে মামুৱে ইউনিভাৰ্চিটিত থাকোতে এটা ব্লগ লিখাৰ আৰম্ভ কৰিছিল যিটোৱে অতি কম সময়ৰ ভিতৰতে পপুলাৰ হৈ পৰিছিল। Google ত ৰেংক কৰিবলৈও সক্ষম হৈছিল তেতিয়াৰ পৰা তাই ৰিলেশ্যনশ্বিপ ব্লগাৰ হিচাপে আন এটা পৰিচয় হ'ল। ফেচবুক টুইটাৰত তাইৰ পোষ্টবোৰ কিছু ভাইৰেল হ'বলৈ ধৰিলে। লাহে লাহে অমিতৰ কথামতে YouTubeত ভিডিঅও দিবলৈ ল'লে। YouTube চেনেলটোৱেও কমসময়তে জনপ্ৰিয়তা লাভ কৰিলে। তাৰপিছৰপৰাই তাইৰ প্ৰায় সময় নোহোৱা নিচিনাৰ। কলেজৰপৰা আহিয়েই প্ৰায়ে মিটিঙলৈ ওলাই যাব লাগে। অমিতেও এইক্ষেত্ৰত মামুক বহুত সহায় কৰিছিল। যেতিয়া সিহঁতৰ বিয়া হৈছিল বুলি মামুৰ ফেন ফল'ৱাৰবোৰে গম পাইছিল তাইৰ মেইল মেছেজৰ ইনবক্স বিয়াৰ শুভেচ্ছাৰে ভৰ্তি হৈ গৈছিল। সকলোৰে শুভেচ্ছাৰে মন্দা অমিতৰ সংসাৰ দুবছৰ ঠিকেই চলি থাকিল। কিন্তু কেণাটো লাগিল সেইখিনিত যেতিয়া অমিতে সংসাৰ বঢ়োৱাৰ কথা মামুক ক'লে। মামু এইক্ষেত্ৰত কোনোপধ্যেই একমত নহয়। তাই বৰ্তমান এইবোৰ ভাবিবই নোৱাৰে। মামুক অমিতৰ লগতে ঘৰৰ মানুহেও বহুত বুজাইও বুজাব নোৱাৰিলে আৰু অৱশেষত জেদী মামুৱে অমিতৰপৰা বেলেগে থকাৰ সিদ্ধান্ত ল'লে।
হঠাৎ কেনেকৈ মানুহ ইমান নিষ্ঠুৰ হ'ব পাৰে। অমিতৰ লগতে মামুৰ ঘৰৰ মানুহো আচৰিত হৈছিল। কেনেকৈ অধিক জনপ্ৰিয়তাই মানুহক অন্ধ কৰিব পাৰে সেইয়া মামুৱে ভালদৰে দেখুৱাই দিলে। তথাপিও যিমান ভুল কৰিলেও নিজৰেই পেটৰ সন্তানকটো মাক-দেউতাকে দলিয়াই পেলাব নোৱাৰে। সেয়ে যি কৰ কৰি থাক বুলি লাহে লাহে মাক-দেউতাকে গা এৰা দিলে। তেওঁলোকৰ দুখ লাগিল অমিতলৈহে। আইনীভাৱে সিহঁতৰ মাজত বিবাহ বিচ্ছেদ নহ'লেও মামু অমিত এতিয়া বেলেগকৈ থাকে। মামুৱে তাক বিচ্ছেদ দিবলৈও ৰাজি আছিল কিন্তু সেইটো অমিতে হ'বলৈ দিয়া নাছিল। যিমান যি কৰিলেও কিয় জানো তাৰ প্ৰেমত কিবা এটা বিশ্বাস আছিল। এদিন হ'লেও যেন মামুৱে নিজৰ ভুল বুজি পাব। আশাত বন্দী অমিত আজি চাৰে তিনিবছৰে মামুৰ বাবে অপেক্ষাৰত। কিন্তু মামুৰ কোনো খবৰেই নাই সেইবোৰলৈ। আজিকালি তাই ফেন ফল'ৱাৰবোৰৰপৰা বেলেগ কথা ভাবিবলৈ সময়েই নাই। কলেজৰ বেছিখিনি সময় ছুটিত থাকি মিটিং কৰি থাকোতেই যায়। তাই তেনেকৈয়ে সুখী।
কেতিয়াবা অমিতৰ মন যায় তাইক লগ ধৰিবলৈ। কিন্তু 'মেন ইগ' বুলি বস্তু এটাও আছেটো। সেয়ে সি ৰৈ যায়। আজিকালি সি হেঙেৰাবাৰীত মামুৰ মাকৰ ঘৰৰ কাষতে ভাড়া ঘৰ লৈ থাকে। তথাপিও সি মামুক লগ পোৱা নাই। মানে তাইৰ যিহে ব্যস্ততা মাকৰ ঘৰলৈও আহিবলৈ সময় নাপায়। আহিলেও ৰাতি আহি ভাতকেইটা খাই গুচি যায়। ব্যস্ততা নে তাই পলাই ফুৰিছে তাৰপৰা!
কিন্তু মামু যিমান ব্যস্ত থাকিলেও যে ককায়েকৰ যঁজা ল'ৰা-ছোৱালী দুটালৈ কেনেবাকৈ সময় উলিয়াব সি জানে। সিহঁতৰ বিয়াৰ কেইমাহমানৰ আগে আগে এক দুই মিনিটৰ অগাপিছাকৈ জন্ম হোৱা বুবু মাইনালৈ তাইৰ খুব মৰম। সিহঁত হালেও পেহীয়েক বুলি ক'লে পৰি মৰে। এটা কথা অমিতৰ আচৰিত লাগে যিজনী ছোৱালীয়ে নিজৰ ভতিজাকক ইমান মৰম কৰিব পাৰে সেই একেজনী ছোৱালীয়েই নিজৰ সন্তান জন্ম দিয়াৰ ক্ষেত্ৰত ইমান বিৰোধ কিয়? যাৰ কাৰণে প্ৰেম বিবাহকো দলিয়াই পেলাইছে। সঁচাকৈয়ে আচৰিত মানুহ নামৰ প্ৰাণীটো দেই!
মামুৱে ইমান বছৰে নভবাকৈ থকা কথাবোৰে তাইক আজি বৰকৈ আমনি কৰিছে। ইমান সৰু কথা এটাতে তাই অমিতৰ নিচিনা ল'ৰাটো যাৰ লগত সাতবছৰ প্ৰেম কৰি ঘৰৰ লগত সমাজৰ লগত যুদ্ধ কৰি সংগ্ৰামৰ মাজেৰে প্ৰেমক পূৰ্ণাংগ ৰূপ দিছিল। সেই অমিতকে নিজৰ স্বাৰ্থৰ কাৰণে দলিয়াই পেলাবলৈ এবাৰো নাভাবিলে। তাক এৰি অহাৰ পিছত এবাৰলৈও তাৰ কথা নোসোধা ছোৱালীজনী কিমান নিষ্ঠুৰ হ'ব পাৰে। আকৌ বোলে তাই বেলেগৰ সংসাৰ যোৰা লগায়। তাইৰ ঘূণে ধৰা সংসাৰখনৰ কথা ফেন ফল'ৱাৰবোৰে গম পালে কি হ'ব? চাৰে তিনিবছৰৰ আগতে ভাঙি যোৱা সংসাৰখনৰ কথা ভাবি থাকোতে তাই যে এয়াৰপৰ্টলৈ ওলোৱাৰ সময় হ'ল গমেই নাপালে।
নাই তাই আজি কোনোপধ্যেই দিল্লী যাব নোৱাৰে। তাই আজি বহুত ভাগৰুৱা। আজিহে উপলব্ধি কৰিলে মামুৱে তাই কিমান অকলশৰীয়া। মামুৱে দিল্লীলৈ নোযোৱাটোকে সিদ্ধান্ত লৈ মিটিংখনৰ কনটেক্ট পাৰ্চনলৈ হাততে থকা স্মাৰ্টফোনটোতে ক্ষমাপ্ৰাৰ্থনাৰ মেইল এটা কৰি তাইৰ প্ৰফেচনেল নম্বৰটো বন্ধ কৰি দিলে।
এনেদৰেই দুপৰীয়া পাৰ হৈ আবেলি হ'ল। কাক ফ'ন কৰিব ধৰিব পৰা নাই। অমিতক নে মাকক। অমিতক ফ'ন কৰিলে সি তাইৰ ফ'ন ৰিচিভ কৰিব জানো! ইমানদিনে ফ'নটো বাদেই মেছেজৰ ৰিপ্লাই নকৰা মামুজনীক জানো অমিতে ক্ষমা কৰিব। সকলোবোৰ ভাবি মামুৱে গধূলি মাককে ফ'নটো লগালে। বহুত সময় ৰিং কৰি থকাৰ পিছত মাকে তাইৰ কলটো ৰিচিভ কৰোতেই 'মা অমিত ক'ত আছে?' মাকে তাইৰ মাতত প্ৰথমতে থতমত খাই আকৌ সুধিলে 'কি কৈছ?'
' মা প্লিজ মোক অমিতৰ ওচৰলৈ লৈ ব'লানা।' বুলি তাই নিজৰ কান্দোনক বাধা দিব নোৱাৰিলে। আজি বহুত দিনৰ মূৰত মামুৱে নজনাকৈয়ে তাইৰ বুকুখন দহি থকা দুখবোৰ কান্দোন হিচাপে ওলাই আহিল। তাইৰ কান্দোন শুনি মাকো ৰৈ থাকিব নোৱাৰিলে। কান্দি কান্দি এসময়ত মামুৱে নিজেই ফ'নটো কাটি বহি থকা জেগাতে শুই পৰিল। পুৱা কলিংবেলৰ শব্দতহে তাই সাৰ পালে। কান্দি ফুলি থকা চকুকেইটা মোহাৰি যেতিয়া দুৱাৰ খুলিলে তাই অলপ সময়ৰ কাৰণে বৰ্জপাত পৰা মানুহৰ দৰে স্থৱীৰ হৈ পৰিল। এইয়া কি দেখিছে তাই অমিতৰ লগত দেখোন তাইৰ মাক থিয় হৈ আছে।
অমিতক দেখি মামুৱে কি কৰিব কি নকৰিব থিয় হৈ থাকোতে যেতিয়া অমিতে 'মানা' বুলি সেই বিশেষ নামটোৰে তাইক মাতিলে, মামু আৰু ৰৈ থাকিব নোৱাৰিলে। মাকৰ উপস্থিতিকো পাহৰি তাক গবা মাৰি ধৰি সৰু ছোৱালীৰ দৰে উচুপি উঠিল। ভালপোৱাৰ সুবাসে আকৌ এবাৰ ঘৰটো মলমলাই তুলিলে।
